വയനാട് മേപ്പാടി തുരങ്കപാത നിർമാണ സ്ഥലത്ത് മണ്ണിടിച്ചിൽ: നാല് മരണം, ഏഴ് പേരെ കാണാതായി; മനുഷ്യനിർമിത ദുരന്തമെന്ന് മുഖ്യമന്ത്രി

വയനാട്: മേപ്പാടി തുരങ്കപാത നിർമാണ സ്ഥലത്ത് ഇന്ന് രാവിലെ ഉണ്ടായ വൻ മണ്ണിടിച്ചിലിൽ നാല് തൊഴിലാളികൾ മരിച്ചു. ഏഴ് പേരെ കാണാതായതായി അധികൃതർ അറിയിച്ചു. പരിക്കേറ്റ ഒൻപത് പേരെ വിവിധ ആശുപത്രികളിൽ പ്രവേശിപ്പിച്ചു.

ആശുപത്രിയിൽ ചികിത്സയിലുള്ളവർ: ഹിര കുമാർ (32), ദിലീപ് (19), സൂരജ് യാദവ് (25), സഞ്ജയ് താക്കൂർ (35), രജനീഷ് (27), തന്മയ് ഘോഷ് (28), കൂപമാൽ (ജയ) (37), കുഞ്ചു (39), സന്തോഷ് കുമാർ എന്നിവരാണ്.

രാവിലെ 10.30 ഓടെയായിരുന്നു അപകടം. തുരങ്കപാത നിർമാണത്തിനിടെ കൂറ്റൻ മൺകൂമ്പാരം ഇടിഞ്ഞുവീണ് റോഡിലേക്കും നിർമാണ മേഖലിലേക്കും പതിക്കുകയായിരുന്നു. മേപ്പാടിയിൽ നിന്ന് ചൂരൽമലയിലേക്ക് പോകുന്ന പ്രധാന പാതയിലാണ് ദുരന്തമുണ്ടായത്. അപകടത്തിന്റെ ദൃശ്യങ്ങൾ പുറത്തുവന്നിട്ടുണ്ട്.

മണ്ണ് നീക്കം ചെയ്യണമെന്ന് നേരത്തെ നിർദേശം നൽകിയിരുന്നെങ്കിലും കരാറുകാർ അത് പാലിച്ചില്ലെന്നും അതാണ് അപകടത്തിന് കാരണമായതെന്നും മുഖ്യമന്ത്രി വി.ഡി. സതീശൻ പറഞ്ഞു. അതീവ ദൗർഭാഗ്യകരമായ സംഭവമാണിതെന്നും ഉത്തരവാദികൾക്കെതിരെ നടപടി സ്വീകരിക്കുമെന്നും അദ്ദേഹം വ്യക്തമാക്കി.

അശാസ്ത്രീയമായി മണ്ണ് കൂട്ടിയിട്ടതാണ് അപകടത്തിന് ഇടയാക്കിയതെന്ന് മന്ത്രി ടി. സിദ്ദിഖും പറഞ്ഞു. ഇത് പ്രകൃതിദുരന്തമല്ല, മനുഷ്യനിർമിത ദുരന്തമാണെന്നും നിർമാണ കമ്പനിക്ക് മുമ്പ് തന്നെ മുന്നറിയിപ്പ് നൽകിയിരുന്നുവെന്നും അദ്ദേഹം വ്യക്തമാക്കി. നിർദേശങ്ങൾ അവഗണിച്ചതിൽ സർക്കാർ കർശന നടപടി സ്വീകരിക്കുമെന്നും മന്ത്രി അറിയിച്ചു.

രക്ഷാപ്രവർത്തനം ഊർജിതമായി തുടരുകയാണ്. മൂന്ന് എൻഡിആർഎഫ് സംഘങ്ങളെ സ്ഥലത്ത് വിന്യസിച്ചിട്ടുണ്ട്. വയനാട് സംഘത്തിന് പുറമെ കോഴിക്കോട്, തൃശ്ശൂർ ജില്ലകളിൽ നിന്നുള്ള സംഘങ്ങളും രക്ഷാപ്രവർത്തനത്തിൽ പങ്കെടുക്കും. ഓരോ എൻഡിആർഎഫ് സംഘത്തിലും 34 അംഗങ്ങളാണുള്ളത്. കാണാതായവർക്കായുള്ള തിരച്ചിൽ തുടരുകയാണ്.