പലസ്തീൻ ദേശീയ ഫുട്ബോൾ ടീം അംഗം സുലൈമാൻ അൽ-ഉബൈദ് കൊല്ലപ്പെട്ടു.

ഗാസ: ഗാസയിൽ ഭക്ഷണം കാത്ത് നിന്നവർക്ക് നേരെ ഇസ്രയേൽ നടത്തിയ ആക്രമണത്തിൽ പലസ്തീൻ ദേശീയ ഫുട്ബോൾ ടീം അംഗം സുലൈമാൻ അൽ-ഉബൈദ് കൊല്ലപ്പെട്ടു. ‘പലസ്തീൻ പെലെ’ എന്നറിയപ്പെട്ടിരുന്ന 41 കാരനായ അൽ-ഉബൈദ് തന്‍റെ കരിയറിൽ നൂറിലധികം ഗോളുകൾ അടിച്ചു കൂട്ടിയ കളിക്കാരനാണ്. “ബുധനാഴ്ച തെക്കൻ ഗാസ മുനമ്പിൽ മാനുഷിക സഹായത്തിനായി കാത്തിരുന്നവരെ ലക്ഷ്യമിട്ട് ഇസ്രായേൽ അധിനിവേശ സേന നടത്തിയ ആക്രമണത്തിൽ മുൻ ദേശീയ ടീം കളിക്കാരനും ഖദാമത്ത് അൽ-ഷാത്തി ടീമിന്‍റെ താരവുമായ സുലൈമാൻ അൽ-ഉബൈദ് രക്തസാക്ഷിയായി” പലസ്തീൻ ഫുട്ബോൾ അസോസിയേഷൻ പ്രസ്താവനയിലൂടെ അറിയിച്ചു. അൽ-അമാരി, ഖദാമത് അൽ-ഷാത്തി, ഗാസ സ്‌പോർട്‌സ്‌ ക്ലബ്ബ്‌ തുടങ്ങി നിരവധി ക്ലബ്ബുകൾക്ക്‌ വേണ്ടി സുലൈമാൻ അൽ-ഒബൈദ് പന്തുതട്ടിയിട്ടുണ്ട്. 2010ൽ എഎഫ്‌സി ചലഞ്ച്‌ കപ്പ്‌ യോഗ്യതാ മത്സരത്തിലും, 2014ൽ ലോകകപ്പ്‌ യോഗ്യതാ മത്സരത്തിലും അദ്ദേഹം പലസ്‌തീൻ ടീമിനെ പ്രതിനിധീകരിച്ചിട്ടുണ്ട്. എല്ലാ കളികളിലും മിന്നും പ്രകടനം കാ‍ഴ്ച വച്ചതാണ് അദ്ദേഹത്തിനെ ‘പലസ്തീൻ പെലെ’ എന്ന വിളിപ്പേരിന് അർഹനാക്കിയത്.