മോർഫ് ചെയ്ത നഗ്നചിത്രങ്ങൾ പ്രചരിപ്പിച്ച കേസ്; കാസർകോട് സ്റ്റുഡിയോ ക്യാമറമാൻ പിടിയിൽ

കാസർകോട്: യുവതികളുടെയും പെൺകുട്ടികളുടെയും ചിത്രങ്ങൾ മോർഫ് ചെയ്ത് നഗ്നരൂപത്തിൽ സോഷ്യൽ മീഡിയയിൽ പ്രചരിപ്പിച്ച കേസിൽ സ്റ്റുഡിയോ ക്യാമറമാനെ കാസർകോട് സൈബർ പോലീസ് അറസ്റ്റ് ചെയ്തു. ആദൂർ പോലീസ് സ്റ്റേഷൻ പരിധിയിൽ താമസിക്കുന്ന അനൂപ് (25) ആണ് പിടിയിലായത്. സ്ത്രീകളുടെ സ്വകാര്യതയും മാനവും ഗുരുതരമായി ലംഘിച്ച സംഭവത്തിൽ കാസർകോട് സൈബർ സെൽ സി ഐ മുഹമ്മദ് ഖാന്റെ നേതൃത്വത്തിലുള്ള സംഘമാണ് ശനിയാഴ്ച വൈകുന്നേരം പ്രതിയെ പിടികൂടിയത്. കേസ് രജിസ്റ്റർ ചെയ്ത വിവരം അറിഞ്ഞതോടെ ഒളിവിൽ പോയ പ്രതിയെ ബന്ധുവീട്ടിൽ നിന്നാണ് കസ്റ്റഡിയിലെടുത്തത്. പ്രതിയിൽ നിന്ന് ഡെസ്ക്ടോപ്പ് കമ്പ്യൂട്ടർ, രണ്ട് മൊബൈൽ ഫോണുകൾ, ഹാർഡ് ഡിസ്ക് എന്നിവ പിടിച്ചെടുത്തതായി പോലീസ് അറിയിച്ചു. ഇവ കൂടുതൽ ശാസ്ത്രീയ പരിശോധനയ്ക്കായി ലാബിലേക്ക് അയക്കും. ഇതിലൂടെ കൂടുതൽ ഇരകളെ കണ്ടെത്താനാകുമെന്നാണ് അന്വേഷണ സംഘത്തിന്റെ വിലയിരുത്തൽ. ഇൻസ്റ്റാഗ്രാം അടക്കമുള്ള സോഷ്യൽ മീഡിയ പ്ലാറ്റ്ഫോമുകളിൽ നിന്ന് ശേഖരിച്ച 32-ൽ അധികം ചിത്രങ്ങളാണ് പ്രതി മോർഫ് ചെയ്തതെന്ന് സംശയിക്കുന്നു. ഈ ചിത്രങ്ങൾ നഗ്നരൂപത്തിൽ മാറ്റി ടെലഗ്രാം ഗ്രൂപ്പുകൾ വഴിയും മറ്റു സോഷ്യൽ മീഡിയ പ്ലാറ്റ്ഫോമുകൾ വഴിയും പ്രചരിപ്പിച്ചിരുന്നതായും കണ്ടെത്തി. ചില പുരുഷന്മാരുടെ ചിത്രങ്ങളും യുവതികളുടെ ചിത്രങ്ങളോടൊപ്പം ചേർത്ത് അശ്ലീലരൂപത്തിൽ സൃഷ്ടിച്ചതായും പരാതികളുണ്ട്. സ്വന്തം ചിത്രങ്ങൾ ദുരുപയോഗം ചെയ്യപ്പെട്ടതായി മനസ്സിലാക്കിയ യുവതികൾ പരാതിയുമായി രംഗത്തെത്തിയതോടെ കേസിന് വഴിയൊരുങ്ങി. നിലവിൽ അഞ്ച് യുവതികളാണ് ഔദ്യോഗികമായി പരാതി നൽകിയിരിക്കുന്നത്. ഇരകളുടെ എണ്ണം ഇനിയും വർധിക്കാമെന്ന് പോലീസ് അറിയിച്ചു. പ്രതി ഉപയോഗിച്ച ടെലഗ്രാം അക്കൗണ്ടിന്റെ സാങ്കേതിക വിവരങ്ങൾ തേടി ബന്ധപ്പെട്ട അധികാരികൾക്ക് പോലീസ് കത്ത് അയച്ചിട്ടുണ്ട്. മറ്റ് സോഷ്യൽ മീഡിയ കമ്പനികളോടും വിവരശേഖരണം നടത്തും. ആദ്യം തെളിവുകളുടെ അഭാവത്തിൽ വിട്ടയച്ച പ്രതിയെ, തുടർന്ന് കൂടുതൽ പരാതികൾ ലഭിച്ചതോടെയാണ് വീണ്ടും പിടികൂടിയത്.