യുഎഇയിലെ സ്കൂളുകളിൽ കൃത്രിമ ബുദ്ധി (എ ഐ) നിർബന്ധിത വിഷയമായി പ്രഖ്യാപിച്ച് ഷെയ്ഖ് മുഹമ്മദ്.

ദുബായ്: വരുന്ന അധ്യയന വർഷം മുതൽ കിന്റർഗാർട്ടൻ മുതൽ പന്ത്രണ്ടാം ക്ലാസ് വരെയുള്ള സർക്കാർ വിദ്യാഭ്യാസത്തിന്റെ  എല്ലാ തലങ്ങളിലും ആർട്ടിഫിഷ്യൽ ഇന്റലിജൻസ് (എ ഐ) ഒരു വിഷയമായി അവതരിപ്പിക്കുന്നതിനുള്ള അന്തിമ പാഠ്യപദ്ധതിക്ക് യുഎഇ മന്ത്രിസഭ അംഗീകാരം നൽകി.

യുഎഇ വൈസ് പ്രസിഡന്റും പ്രധാനമന്ത്രിയും ദുബായ് ഭരണാധികാരിയുമായ ഹിസ് ഹൈനസ് ഷെയ്ഖ് മുഹമ്മദ് ബിൻ റാഷിദ് അൽ മക്തൂം തന്റെ എക്സ് അക്കൗണ്ടിൽ ഈ തീരുമാനം പ്രഖ്യാപിച്ചു. അതിവേഗം വികസിച്ചുകൊണ്ടിരിക്കുന്ന ഒരു ലോകത്തിനായി ഭാവിതലമുറയെ സജ്ജമാക്കുക എന്ന രാജ്യത്തിന്റെ ദീർഘകാല ദർശനത്തിന്റെ ഭാഗമായി ഈ തീരുമാനം.

"ഭാവിതലമുറയെ വ്യത്യസ്തമായ ഒരു ഭാവിയിലേക്കും, പുതിയ ലോകത്തിലേക്കും, നൂതന കഴിവുകൾക്കുമായി ഒരുക്കുന്നതിനുള്ള യുഎഇയുടെ ദീർഘകാല പദ്ധതികളുടെ ഭാഗമായി, അടുത്ത അധ്യയന വർഷം മുതൽ കിന്റർഗാർട്ടൻ മുതൽ ഗ്രേഡ് 12 വരെയുള്ള യുഎഇയിലെ സർക്കാർ വിദ്യാഭ്യാസത്തിന്റെ എല്ലാ ഘട്ടങ്ങളിലും "ആർട്ടിഫിഷ്യൽ ഇന്റലിജൻസ്" ഒരു വിഷയമായി അവതരിപ്പിക്കുന്നതിനുള്ള അന്തിമ പാഠ്യപദ്ധതി യുഎഇ സർക്കാർ ഇന്ന് അംഗീകരിച്ചു," ഷെയ്ഖ് മുഹമ്മദ് പറഞ്ഞു.

"ലോകത്തിന്റെ ജീവിതരീതിയെ തന്നെ മാറ്റിമറിക്കാൻ കൃത്രിമബുദ്ധി സഹായിക്കുമെന്ന് ഉറപ്പിച്ചുപറയുന്ന സമഗ്രമായ ഒരു പാഠ്യപദ്ധതി വികസിപ്പിക്കുന്നതിൽ വിദ്യാഭ്യാസ മന്ത്രാലയം നടത്തുന്ന ശ്രമങ്ങളെ ഞങ്ങൾ അഭിനന്ദിക്കുന്നു. സാങ്കേതിക വീക്ഷണകോണിൽ നിന്ന് എ ഐയെക്കുറിച്ചുള്ള ആഴത്തിലുള്ള ധാരണ നമ്മുടെ കുട്ടികൾക്ക് പഠിപ്പിക്കുക, അതോടൊപ്പം ഈ പുതിയ സാങ്കേതികവിദ്യയുടെ ധാർമ്മികതയെക്കുറിച്ചുള്ള അവബോധം വളർത്തുക, അതിന്റെ ഡാറ്റ, അൽഗോരിതങ്ങൾ, ആപ്ലിക്കേഷനുകൾ, അപകടസാധ്യതകൾ, സമൂഹവുമായും ജീവിതവുമായും ഉള്ള ബന്ധം എന്നിവയെക്കുറിച്ചുള്ള അവരുടെ ഗ്രാഹ്യം വർദ്ധിപ്പിക്കുക എന്നിവയാണ് ഞങ്ങളുടെ ലക്ഷ്യം.

നമ്മുടേതിൽ നിന്ന് വ്യത്യസ്തമായ ഒരു സമയത്തേക്ക്, നമ്മുടേതിൽ നിന്ന് വ്യത്യസ്തമായ സാഹചര്യങ്ങളോടെ, വരും ദശകങ്ങളിൽ നമ്മുടെ രാജ്യത്ത് വികസനത്തിന്റെയും പുരോഗതിയുടെയും തുടർച്ചയായ ആക്കം ഉറപ്പാക്കുന്ന പുതിയ കഴിവുകൾ ഉപയോഗിച്ച് നമ്മുടെ കുട്ടികളെ സജ്ജരാക്കുക എന്നതാണ് ഞങ്ങളുടെ ഉത്തരവാദിത്തം."ഷെയ്ഖ് മുഹമ്മദ്  വ്യക്തമാക്കി.