ഷാർജയിൽ കെട്ടിടത്തിന്റെ പതിനേഴാം നിലയിൽ നിന്നും വീണ് അമ്മയും, മകളും മരിച്ചു.

ഷാർജ: ഷാർജയിലെ പതിനേഴാം നിലയിലുള്ള അപ്പാർട്ട്മെന്റിന്റെ ബാൽക്കണിയിൽ നിന്ന് 33 വയസ്സുള്ള ഇന്ത്യൻ സ്ത്രീയും രണ്ട് വയസ്സുള്ള മകളും വീണു മരിച്ചു .

വൈകുന്നേരം 4:30 ഓടെയാണ് സംഭവം. വീഴുന്ന സമയത്ത് സ്ത്രീയുടെ ഭർത്താവ് അപ്പാർട്ട്മെന്റിനുള്ളിൽ ഉറങ്ങുകയായിരുന്നുവെന്ന് അധികൃതർ അറിയിച്ചു.

ദൃക്സാക്ഷികൾ ഉടൻ തന്നെ പോലീസ് ഓപ്പറേഷൻസ് റൂമുമായി ബന്ധപ്പെട്ടു, പോലീസ് പട്രോളിംഗ് സംഘങ്ങൾ, ബുഹൈറ പോലീസ് സ്റ്റേഷനിലെ സിഐഡി ഉദ്യോഗസ്ഥർ, ഫോറൻസിക് വിദഗ്ധർ, നാഷണൽ ആംബുലൻസ് എന്നിവർ ഉടനടി സംഭവ സ്ഥലത്തെത്തി തുടർ നടപടികൾ സ്വീകരിച്ചു.

അമ്മ സംഭവസ്ഥലത്ത് തന്നെ മരിച്ചതായും, ഗുരുതരമായി പരിക്കേറ്റ മകളെ ഉടൻ തന്നെ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ലെന്ന് അധികൃതർ വ്യക്തമാക്കി.

മൃതദേഹങ്ങൾ ആശുപത്രിയിലേക്കും തുടർന്ന് പോസ്റ്റ്‌മോർട്ടത്തിനായി ഫോറൻസിക് ലബോറട്ടറിയിലേക്കും മാറ്റിയതായി അധികൃതർ സ്ഥിരീകരിച്ചു.

സംഭവത്തെ ആത്മഹത്യയായി പോലീസ് തരംതിരിച്ചിട്ടുണ്ടെങ്കിലും കാരണം വ്യക്തമല്ല. കൂടുതൽ അന്വേഷണത്തിനായി കേസ് പബ്ലിക് പ്രോസിക്യൂഷന് കൈമാറി.