ആർഎസ്എസ് കൊലവിളി രാഷ്ട്രീയത്തിനെതിരെ സിപിഎം പ്രതിഷേധ സദസ്സ്; പിണറായി വിജയൻ ഉദ്ഘാടനം ചെയ്തു

കാഞ്ഞങ്ങാട്: ആർഎസ്എസ് കൊലവിളി രാഷ്ട്രീയത്തിനും ക്ഷേത്രങ്ങൾ കൊള്ളയടിക്കുന്നതിനുമെതിരെ സിപിഎം സംഘടിപ്പിച്ച പ്രതിഷേധ സദസ്സ് പ്രതിപക്ഷ നേതാവ് പിണറായി വിജയൻ ഉദ്ഘാടനം ചെയ്തു. കാഞ്ഞങ്ങാട് ടൗൺ ഹാളിൽ നടന്ന പരിപാടിയിൽ സംസാരിച്ച അദ്ദേഹം, കേന്ദ്രത്തിൽ അധികാരം ലഭിച്ച ശേഷം ഭരണഘടനയെ തകർക്കാനുള്ള ശ്രമമാണ് ബിജെപിയും സംഘപരിവാർ സംഘടനകളും നടത്തുന്നതെന്ന് ആരോപിച്ചു.

ഇടതുപക്ഷത്തിന്റെ ആവശ്യപ്രകാരം നടപ്പാക്കിയ തൊഴിലുറപ്പ് പദ്ധതിയെ ബിജെപി അട്ടിമറിച്ചുവെന്നും പദ്ധതിക്കാവശ്യമായ ഫണ്ട് പോലും ഇപ്പോൾ അനുവദിക്കുന്നില്ലെന്നും അദ്ദേഹം പറഞ്ഞു. കേരളത്തെ ആർഎസ്എസിന് അടിയറവ് വെക്കാനുള്ള ശ്രമമാണ് നടക്കുന്നതെന്നും പിണറായി വിജയൻ ആരോപിച്ചു.

പരിപാടിയിൽ സിപിഎം ജില്ലാ സെക്രട്ടറി എം. രാജഗോപാൽ, മുൻ എംപി പി. കരുണാകരൻ, സി.എച്ച്. കുഞ്ഞമ്പു, വി.വി. രമേശൻ, പി. അപ്പുക്കുട്ടൻ, കെ. രാജ്മോഹനൻ, ഇ. പത്മാവതി, ബേബി ബാലകൃഷ്ണൻ, വി.പി.പി. മുസ്തഫ, പ്രശാന്ത് എന്നിവർ പങ്കെടുത്തു.