ജില്ലാ ഷൂട്ടിംഗ് ചാമ്പ്യൻഷിപ്പ്: വിജയികൾക്ക് മെഡലുകൾ വിതരണം ചെയ്ത് എസ്.പി.; അത്യാധുനിക ഷൂട്ടിംഗ് ആയുധങ്ങൾ റേഞ്ചിന് കൈമാറി

കാസർകോട്: കാസർകോട് ജില്ലാ റൈഫിൾ അസോസിയേഷൻ (കെ.എസ്.ആർ.ഡി.എ.) സംഘടിപ്പിച്ച ജില്ലാ ഷൂട്ടിംഗ് ചാമ്പ്യൻഷിപ്പിൽ വിവിധ ഇനങ്ങളിൽ വിജയികളായ താരങ്ങൾക്ക് മെഡലുകളും സർട്ടിഫിക്കറ്റുകളും ജില്ലാ റൈഫിൾ അസോസിയേഷൻ പ്രസിഡന്റും കാസർകോട് ജില്ലാ പോലീസ് മേധാവിയുമായ പി. നിധിൻ രാജ് ഐ.പി.എസ്. വിതരണം ചെയ്തു.

അമ്പലത്തറയിലെ കെ.എസ്.ആർ.ഡി.എ. ഷൂട്ടിംഗ് റേഞ്ചിൽ നടന്ന ചടങ്ങിൽ അസോസിയേഷൻ പുതുതായി സ്വന്തമാക്കിയ രണ്ട് അത്യാധുനിക ഷൂട്ടിംഗ് ആയുധങ്ങൾ ജില്ലാ പോലീസ് മേധാവി ഔപചാരികമായി റേഞ്ചിന് കൈമാറി. ജില്ലാ സെക്രട്ടറി അഡ്വ. കെ.എ. നാസറും ജോയിന്റ് സെക്രട്ടറി പി.വി. രാജേന്ദ്രകുമാറും ചേർന്ന് ആയുധങ്ങൾ ഏറ്റുവാങ്ങി.

ജില്ലയിലെ ഷൂട്ടിംഗ് കായികരംഗത്തിന്റെ വളർച്ചയ്ക്കും ദേശീയ-അന്തർദേശീയ നിലവാരത്തിലുള്ള പരിശീലനത്തിനും പുതിയ ആയുധങ്ങൾ കൂടുതൽ കരുത്തേകുമെന്ന് പി. നിധിൻ രാജ് പറഞ്ഞു.

കെ.എസ്.ആർ.ഡി.എ. സെക്രട്ടറി അഡ്വ. അബ്ദുൻ നസർ അധ്യക്ഷത വഹിച്ചു. ജോയിന്റ് സെക്രട്ടറി പി.വി. രാജേന്ദ്രകുമാർ സ്വാഗതവും സുമേഷ് സുകുമാരൻ നന്ദിയും രേഖപ്പെടുത്തി.

ഷൂട്ടിംഗ് രംഗത്തെ കായികപ്രതിഭകളെ പ്രോത്സാഹിപ്പിക്കുന്നതിനും ജില്ലയിലെ പരിശീലന സൗകര്യങ്ങൾ കൂടുതൽ ശക്തിപ്പെടുത്തുന്നതിനുമായി കെ.എസ്.ആർ.ഡി.എ. നടത്തുന്ന പ്രവർത്തനങ്ങളെ ചടങ്ങിൽ അഭിനന്ദിച്ചു.