വിലപിടിപ്പുള്ള വസ്തുക്കൾ കൈവശം വെക്കൽ; നിയന്ത്രണങ്ങളുമായി കുവൈറ്റ് കസ്റ്റംസ്.

കുവൈറ്റ് സിറ്റി: കുവൈറ്റ് അന്താരാഷ്ട്ര വിമാനത്താവളം വഴി യാത്ര ചെയ്യുന്നവർ പണം, സ്വർണ്ണം, മറ്റ് ഉയർന്ന മൂല്യമുള്ള വസ്തുക്കൾ എന്നിവ കൈവശം വെക്കുന്നതുമായി ബന്ധപ്പെട്ട് പുതിയ നടപടി ക്രമവുമായി ജനറൽ അഡ്മിനിസ്‌ട്രേഷൻ ഓഫ് കസ്റ്റംസ്. സുരക്ഷ വർദ്ധിപ്പിക്കുന്നതിനും അന്താരാഷ്ട്ര മാനദണ്ഡങ്ങൾ പാലിക്കുന്നതിനും വേണ്ടിയാണ് ഈ നടപടികൾ. പണം, സ്വർണ്ണം, മറ്റ് വിലപിടിപ്പുള്ള വസ്തുക്കൾ എന്നിവ കൊണ്ടുപോകുന്നതിന് വ്യക്തമായ നിബന്ധനകളാണ് ഇതിലൂടെ മുന്നോട്ട് വെച്ചിരിക്കുന്നത്. കുവൈത്തി ദിനാറിലോ മറ്റ് ഏതെങ്കിലും വിദേശ അല്ലെങ്കിൽ പ്രാദേശിക കറൻസികളിലോ 3,000 കുവൈത്തി ദിനാറോ അതിൽ കൂടുതലോ പണവുമായി യാത്ര ചെയ്യുന്നവർ പുറപ്പെടുന്നതിന് മുമ്പോ എത്തിച്ചേരുമ്പോഴോ കസ്റ്റംസിൽ അത് നിർബന്ധമായും വെളിപ്പെടുത്തണം. വാച്ചുകൾ, ആഭരണങ്ങൾ, ഉയർന്ന വിലയുള്ള ഇലക്ട്രോണിക് ഉപകരണങ്ങൾ എന്നിവ കൈവശം വെക്കുമ്പോൾ അവ ഹാൻഡ് ബാഗേജിൽ കൊണ്ടുപോകണം. ഉടമസ്ഥാവകാശം തെളിയിക്കുന്നതിനായി ഇൻവോയ്‌സുകൾ കൈവശം വെക്കാൻ യാത്രക്കാർക്ക് നിർദ്ദേശം നൽകിയിട്ടുണ്ട്. എല്ലാതരം സ്വർണ്ണവും (ബാറുകൾ, നാണയങ്ങൾ, ആഭരണങ്ങൾ) കസ്റ്റംസിൽ വെളിപ്പെടുത്തണം. കുവൈത്തിൽ നിന്ന് പുറപ്പെടുന്ന യാത്രക്കാർ കുവൈത്ത് വിടുന്നതിന് മുമ്പ് ഒരു കസ്റ്റംസ് ഡിക്ലറേഷൻ ഫോം പൂരിപ്പിക്കണം. കുവൈത്തിലേക്ക് വരുന്ന യാത്രക്കാർ ഡിക്ലറേഷൻ ഫോമും ബന്ധപ്പെട്ട ഇൻവോയ്‌സുകളും കസ്റ്റംസിന് മുന്നിൽ ഹാജരാക്കണം.