എട്ടാം ക്ലാസ് വിദ്യാർഥിയെ മർദിച്ചെന്ന പരാതി; പയ്യന്നൂരിൽ പി.ടി അധ്യാപകനെതിരെ കേസ്

പയ്യന്നൂർ: സ്കൂൾ ഗ്രൗണ്ടിൽ എട്ടാം ക്ലാസ് വിദ്യാർഥിയെ ക്രൂരമായി മർദിച്ചെന്ന പരാതിയിൽ പി.ടി അധ്യാപകനെതിരെ പയ്യന്നൂർ പൊലീസ് കേസെടുത്തു. തായിനേരി എസ്.എ.ബി.ടി.എം ഹൈസ്‌കൂളിലെ കായിക അധ്യാപകൻ രഘുവിനെതിരെയാണ് നടപടി.

ജൂൺ 22-ന് രാവിലെ 11 മണിയോടെ സ്കൂൾ ഗ്രൗണ്ടിൽ വെച്ചാണ് സംഭവം നടന്നതെന്നാണ് പ്രഥമ വിവര റിപ്പോർട്ടിൽ (എഫ്.ഐ.ആർ.) പറയുന്നത്. പതിമൂന്നുകാരനായ വിദ്യാർഥിയെ തടഞ്ഞുനിർത്തി കൈകൊണ്ടും വടികൊണ്ടും മർദിച്ച് പരിക്കേൽപ്പിച്ചെന്നാണ് പരാതി.

വിദ്യാർഥിയുടെ മൊഴിയുടെ അടിസ്ഥാനത്തിൽ ജൂലൈ ഒന്നിനാണ് കേസ് രജിസ്റ്റർ ചെയ്തത്. ഭാരതീയ ന്യായ സംഹിത (ബി.എൻ.എസ്) വകുപ്പുകളായ 126(2), 115(2), 118(1) എന്നിവയ്ക്കൊപ്പം കുട്ടികൾക്കെതിരായ അതിക്രമം തടയുന്നതിനുള്ള ജുവനൈൽ ജസ്റ്റിസ് ആക്ടിലെ 75-ാം വകുപ്പും അധ്യാപകനെതിരെ ചുമത്തിയിട്ടുണ്ട്.

സംഭവത്തിൽ പൊലീസ് അന്വേഷണം തുടരുകയാണ്. കേസിൽ പ്രതിയായ അധ്യാപകനെ ഇതുവരെ കസ്റ്റഡിയിലെടുത്തിട്ടില്ല. വിദ്യാർഥിക്ക് പറ്റിയ പരിക്കുകളെക്കുറിച്ചും സംഭവത്തിന്റെ മറ്റ് സാഹചര്യങ്ങളെക്കുറിച്ചും പൊലീസ് വിശദമായ അന്വേഷണം നടത്തിവരികയാണ്.