മാട്രിമോണിയൽ സൈറ്റിലൂടെ പരിചയം; വിവാഹ വാഗ്ദാനം നൽകി 8 ലക്ഷം രൂപ തട്ടിയെടുത്ത യുവാവ് യുവതിയെ പീഡിപ്പിച്ചതായി പരാതി
കാസർഗോഡ്: മാട്രിമോണിയൽ സൈറ്റിലൂടെ പരിചയപ്പെട്ട യുവതിയെ വിവാഹ വാഗ്ദാനം നൽകി ലക്ഷങ്ങൾ തട്ടിയെടുത്തതും, ലൈംഗികമായി പീഡിപ്പിച്ചതുമായി ബന്ധപ്പെട്ട പരാതിയിൽ യുവാവിനെതിരെ കേസ്. വിദ്യാനഗർ പോലീസ് സ്റ്റേഷൻ പരിധിയിൽ താമസിക്കുന്ന 32-കാരിയുടെ പരാതിയുടെ അടിസ്ഥാനത്തിൽ വടകര സ്വദേശിയായ മുഹമ്മദ് ഷമ്മാസിനെതിരെ കാസർഗോഡ് വനിതാ പോലീസ് കേസെടുത്തു.
മാട്രിമോണിയൽ സൈറ്റിലൂടെയായിരുന്നു ഇരുവരുടെയും പരിചയം ആരംഭിച്ചത്. തുടർന്ന് വിവാഹം കഴിക്കാമെന്ന് വിശ്വസിപ്പിച്ച് യുവതിയിൽ നിന്ന് ഏകദേശം എട്ട് ലക്ഷം രൂപ കൈപ്പറ്റിയതായും പരാതിയിൽ പറയുന്നു. ഇതിനിടെ പല തവണ പീഡനത്തിനിരയാക്കിയെന്നും യുവതി ആരോപിക്കുന്നു.
പിന്നീട് പ്രതി യുവതിയുമായി അകലം പാലിക്കാനും ബന്ധത്തിൽ നിന്ന് പിന്മാറാനും ശ്രമിച്ചതോടെയാണ് താൻ വഞ്ചിക്കപ്പെട്ടതായി യുവതിക്ക് മനസ്സിലായത്. തുടർന്ന് യുവതി പോലീസിൽ പരാതി നൽകുകയായിരുന്നു.
സംഭവത്തിൽ വിശദമായ അന്വേഷണം പുരോഗമിക്കുകയാണെന്ന് പോലീസ് അറിയിച്ചു.
What's Your Reaction?
