മുഖ്യമന്ത്രി പിണറായി വിജയൻ കുവൈത്ത് ഉപപ്രധാനമന്ത്രി ഷെയ്ഖ് ഫഹദ് യൂസഫ് സൗദ് അൽ-സബാഹുമായി കൂടിക്കാഴ്ച നടത്തി.

കുവൈത്ത് സിറ്റി: കേരളവും, കുവൈത്തും തമ്മിലുള്ള ബന്ധം കൂടുതൽ ശക്തിപ്പെടുത്തുന്നതിൻ്റെ ഭാഗമായി കേരള മുഖ്യമന്ത്രി പിണറായി വിജയൻ കുവൈത്ത് ഉപപ്രധാനമന്ത്രി ഷെയ്ഖ് ഫഹദ് യൂസഫ് സൗദ് അൽ-സബാഹുമായി കൂടിക്കാഴ്ച നടത്തി. കൂടിക്കാഴ്ചയിൽ പരസ്പരം സഹകരിക്കാൻ കഴിയുന്ന വിവിധ വിഷയങ്ങൾ ചർച്ചയായി. വിവിധ മേഖലകളിലെ സഹകരണമായിരുന്നു കൂടിക്കാഴ്ചയുടെ പ്രധാന അജണ്ട. കേരളത്തിലെ അടിസ്ഥാന സൗകര്യ വികസനം, ഐ ടി, ടൂറിസം തുടങ്ങിയ മേഖലകളിൽ കുവൈത്തിൽ നിന്നുള്ള നിക്ഷേപം ആകർഷിക്കുന്നതിനെക്കുറിച്ച് ചർച്ച ചെയ്തു. കുവൈത്തിലെ മലയാളി പ്രവാസികളുടെ തൊഴിൽ സുരക്ഷ ഉറപ്പാക്കുന്നതിനും, പുതിയ തൊഴിൽ മേഖലകളിൽ മലയാളികൾക്ക് അവസരം ലഭിക്കുന്നതിനും വേണ്ട സഹകരണം തേടി. കുവൈത്തിലെ മലയാളി സമൂഹത്തിന്റെ ക്ഷേമം, അവരുടെ പ്രശ്നങ്ങൾ, വിദ്യാഭ്യാസം, ആരോഗ്യ സംരക്ഷണം എന്നിവ സംബന്ധിച്ച വിഷയങ്ങൾ മുഖ്യമന്ത്രി ഉന്നയിച്ചു. കേരളത്തിലേക്കും തിരിച്ചുമുള്ള വിമാന സർവീസുകൾ വർദ്ധിപ്പിക്കുക, ടിക്കറ്റ് നിരക്കുകൾ നിയന്ത്രിക്കുക തുടങ്ങിയ ആവശ്യങ്ങളും ചർച്ചചെയ്യപ്പെട്ടു. മുഖ്യമന്ത്രിയുടെ സന്ദർശനം കുവൈത്തുമായി കേരളത്തിനുള്ള ദീർഘകാല ബന്ധം ഊട്ടിയുറപ്പിക്കാൻ സഹായിക്കുമെന്നും, ഇത് പ്രവാസികൾക്ക് കൂടുതൽ ആശ്വാസം നൽകുമെന്നുമാണ് പ്രതീക്ഷിക്കുന്നത്. കുവൈറ്റ് അമീറിന്റെ പ്രധാന കൊട്ടാരമായ അൽ ബയാൻ കൊട്ടാരത്തിൽ മുഖ്യമന്ത്രിക്ക് ഊഷ്മളമായ സ്വീകരണം ലഭിച്ചു . കുവൈറ്റിന്റെ ധനകാര്യ മന്ത്രിയും കുവൈറ്റ് ഇൻവെസ്റ്റ്‌മെന്റ് അതോറിറ്റി ചെയർമാനുമായ സഅദ് അൽ മുനൈഫിയും കൂടിക്കാഴ്ചയിൽ പങ്കെടുത്തു.