ബേക്കലിൽ ടൂറിസ്റ്റ് ബസ് മറിഞ്ഞ് 30 പേർക്ക് പരിക്ക്; രണ്ടുപേരുടെ നില ഗുരുതരം

കാഞ്ഞങ്ങാട്: ബേക്കൽ പാലത്തിന് സമീപം ടൂറിസ്റ്റ് ബസ് നിയന്ത്രണം വിട്ട് മറിഞ്ഞ് 30പേർക്ക് പരിക്കേറ്റു. പരിക്കേറ്റവരിൽ രണ്ടുപേരുടെ നില ഗുരുതരമാണ്. ഇന്ന് പുലർച്ചെയാണ് സംസ്ഥാനപാതയിൽ അപകടമുണ്ടായത്.

ഗോവയിൽ വിനോദയാത്ര പൂർത്തിയാക്കി എറണാകുളത്തേക്ക് മടങ്ങുകയായിരുന്ന സംഘത്തിന്റെ ബസാണ് അപകടത്തിൽപ്പെട്ടത്. നിയന്ത്രണം നഷ്ടപ്പെട്ട ബസ് റോഡരികിലേക്ക് തലകീഴായി മറിയുകയായിരുന്നു. സ്ത്രീകളും കുട്ടികളുമടക്കം 36 പേർ ബസിലുണ്ടായിരുന്നു.

അപകടം ശ്രദ്ധയിൽപ്പെട്ട നാട്ടുകാർ ഉടൻ രക്ഷാപ്രവർത്തനം നടത്തി. തുടർന്ന് സ്ഥലത്തെത്തിയ ബേക്കൽ പോലീസും രക്ഷാപ്രവർത്തനങ്ങൾക്ക് നേതൃത്വം നൽകി. പരിക്കേറ്റവരെ ഉദുമയിലെയും കാസർകോട്ടെയും വിവിധ ആശുപത്രികളിൽ പ്രവേശിപ്പിച്ചു.

ഡ്രൈവർ ഉറങ്ങിപ്പോയതാകാം അപകടത്തിന് കാരണമെന്നാണ് പ്രാഥമിക നിഗമനം.