പഹൽ ഗാം ഭീകരാക്രമണം; യുഎഇ പ്രസിഡന്റ് അനുശോചനം അറിയിച്ചു.

അബുദാബി: യുഎഇ പ്രസിഡന്റ് ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാൻ ഇന്ത്യൻ പ്രധാനമന്ത്രി നരേന്ദ്ര മോദിയുമായി ടെലിഫോൺ സംഭാഷണം നടത്തി. ഇരു രാജ്യങ്ങളും തമ്മിലുള്ള തന്ത്രപരമായ ബന്ധങ്ങളെക്കുറിച്ചും, ജനങ്ങളുടെ പ്രയോജനത്തിനായി ബന്ധം കൂടുതൽ ശക്തിപ്പെടുത്തുന്നതിനുള്ള വഴികളെക്കുറിച്ചും അവർ ചർച്ച ചെയ്തു.

ജമ്മു കശ്മീരിലെ പഹൽഗാമിലുണ്ടായ ഭീകരാക്രമണത്തിൽ കൊല്ലപ്പെട്ടവർക്ക് ഇന്ത്യൻ പ്രധാനമന്ത്രിയോട് അനുശോചനം രേഖപ്പെടുത്തുകയും പരിക്കേറ്റവർക്ക് വേഗത്തിൽ സുഖം പ്രാപിക്കട്ടെ എന്ന് ആശംസിക്കുകയും ചെയ്തു. 

എല്ലാ രൂപത്തിലുമുള്ള ഭീകരതയെയും യുഎഇ നിരാകരിക്കുമെന്നും, സമൂഹത്തിലെ സുരക്ഷയ്ക്കും സ്ഥിരതയ്ക്കും അന്താരാഷ്ട്ര സമാധാനത്തിനും ഭീഷണിയാണെന്നും അദ്ദേഹം കൂട്ടിച്ചേർത്തു.

യുഎഇയുടെ തുടർന്നുള്ള പുരോഗതിയും സമൃദ്ധിയും ആശംസിച്ചുകൊണ്ട്, ഇന്ത്യയോടും അവിടുത്തെ ജനങ്ങളോടും പ്രകടിപ്പിച്ച ആത്മാർത്ഥമായ വികാരങ്ങൾക്കും അനുശോചനങ്ങൾക്കും പ്രധാനമന്ത്രി മോദി ഹിസ് ഹൈനസ് ഷെയ്ഖ് മുഹമ്മദ് ബിൻ സായിദ് അൽ നഹ്യാനോട് നന്ദി പറഞ്ഞു.