ലോക ഫുട്ബോൾ ആവേശത്തിനിടെ ദേശസ്നേഹത്തിന്റെ ഗോൾ; വേറിട്ട സന്ദേശവുമായി ടീം കാരാക്കോട്

മടിക്കൈ: ലോക ഫുട്ബോളിന്റെ ആവേശം രാജ്യമൊട്ടാകെ അലയടിക്കുമ്പോൾ, മടിക്കൈ കാരാക്കോട്ടെ ഒരു കൂട്ടം യുവാക്കൾ ഫുട്ബോൾ പ്രണയത്തിന് വേറിട്ടൊരു മുഖം നൽകി ശ്രദ്ധേയരാകുന്നു. വിദേശ ടീമുകളുടെയും സൂപ്പർ താരങ്ങളുടെയും പേരിൽ വൻ ഫ്ലക്സുകളും ആഘോഷങ്ങളും അരങ്ങേറുന്ന കാലത്ത്, സ്വന്തം രാജ്യത്തോടുള്ള സ്നേഹവും ഇന്ത്യൻ ഫുട്ബോളിനോടുള്ള പിന്തുണയും ഉയർത്തിപ്പിടിച്ചാണ് ഇവർ രംഗത്തെത്തിയത്.

കാരാക്കോട് പുലരി ക്ലബ്ബ് പ്രവർത്തകരുടെ നേതൃത്വത്തിൽ “ടീം ഇന്ത്യ ഫാൻസ്” എന്ന പേരിൽ സ്ഥാപിച്ച കൂറ്റൻ ഫ്ലക്സ് ഇപ്പോൾ ശ്രദ്ധ നേടുകയാണ്. ലോകോത്തര താരങ്ങളുടെ മികവിനെ അംഗീകരിക്കുമ്പോഴും, സ്വന്തം രാജ്യത്തെ മറന്ന് അന്യരാജ്യങ്ങളുടെ കൊടിപിടിക്കാനാവില്ലെന്ന ശക്തമായ സന്ദേശമാണ് ഈ ഫ്ലക്സിലൂടെ യുവാക്കൾ സമൂഹത്തിന് മുന്നിൽ വെക്കുന്നത്.

“ഫുട്ബോൾ ഞങ്ങൾക്കും ലഹരിയാണ്. നല്ല കളിക്കാരെ ഞങ്ങൾ ആദരിക്കും. പക്ഷേ പെറ്റമ്മയെയും പിറന്ന നാടിനെയും മാതൃരാജ്യത്തെയും മറന്ന് മറ്റൊരു രാജ്യത്തിന്റെ കൊടി പിടിക്കാൻ ഞങ്ങളെ കിട്ടില്ല” എന്ന ആശയം ഹൃദയസ്പർശിയായ വാക്കുകളിലൂടെ ഫ്ലക്സിൽ ഉൾപ്പെടുത്തിയിട്ടുണ്ട്.

ലോക ഫുട്ബോൾ ആഘോഷങ്ങൾ ആവേശകരമായി മുന്നേറുന്ന സാഹചര്യത്തിൽ, ദേശീയ ബോധവും സ്വന്തം രാജ്യത്തെ കായിക താരങ്ങളോടുള്ള ആദരവും ഒരുപോലെ ഉയർത്തിക്കാട്ടുന്ന കാരാക്കോട്ടെ യുവാക്കളുടെ ഈ സംരംഭം നാട്ടുകാരുടെ പ്രശംസ പിടിച്ചുപറ്റുകയാണ്.