കാഞ്ഞങ്ങാട്ട് സംസ്കാര സാഹിതിയുടെ സാംസ്കാരിക സായാഹ്നം നാളെ

കാഞ്ഞങ്ങാട്: ഇന്ത്യൻ നാഷണൽ കോൺഗ്രസിന്റെ കലാ-സാംസ്കാരിക വിഭാഗമായ കെ.പി.സി.സി. സംസ്കാര സാഹിതി കാസർകോട് ജില്ലാ കമ്മിറ്റി സംഘടിപ്പിക്കുന്ന സാംസ്കാരിക സായാഹ്നം നാളെ വൈകിട്ട് അഞ്ചിന് കാഞ്ഞങ്ങാട് നഗരസഭാ ടൗൺഹാളിൽ നടക്കും. വാർത്താസമ്മേളനത്തിൽ സംഘാടകരാണ് ഇക്കാര്യം അറിയിച്ചത്.

സംസ്കാര സാഹിതി സംസ്ഥാന അധ്യക്ഷൻ സി.ആർ. മഹേഷ് എം.എൽ.എ. പരിപാടി ഉദ്ഘാടനം ചെയ്യും. ജില്ലാ അധ്യക്ഷൻ ബഷീർ ആറങ്ങാടി അധ്യക്ഷത വഹിക്കും. സന്ദീപ് വാര്യർ, നീലകണ്ഠൻ എം.എൽ.എമാർ, ഡി.സി.സി. അധ്യക്ഷൻ പി.കെ. ഫൈസൽ തുടങ്ങിയ നേതാക്കളും സാംസ്കാരിക-സാഹിത്യ രംഗത്തെ പ്രമുഖരും പങ്കെടുക്കും.

സാഹിത്യം, ചലച്ചിത്രം, നാടോടിക്കല തുടങ്ങിയ മേഖലകളിൽ ശ്രദ്ധേയമായ സംഭാവനകൾ നൽകിയ സംസ്കാര സാഹിതി സംസ്ഥാന ഭാരവാഹികളെയും ജില്ലയിലെ കലാകാരന്മാരെയും ചടങ്ങിൽ ആദരിക്കും. കേരള സംഗീത നാടക അക്കാദമി സെക്രട്ടറി എൻ.വി. പ്രദീപ്കുമാർ, നാടോടിക്കലാ അക്കാദമി സെക്രട്ടറി പ്രദീപ് കുമാർ പയ്യന്നൂർ, ചലച്ചിത്ര വികസന കോർപ്പറേഷൻ ഉപാധ്യക്ഷൻ ആലപ്പി അഷ്റഫ് എന്നിവരെയും ജില്ലയിലെ കലാ-സാംസ്കാരിക പ്രവർത്തകരെയും ആദരിക്കും.

തുടർന്ന് ഏകാഭിനയം, നൃത്തം, തിരുവാതിരക്കളി, ശാസ്ത്രീയ നൃത്തം, ഭരതനാട്യം തുടങ്ങിയ കലാപരിപാടികൾ അരങ്ങേറും. രാത്രി ഏഴിന് തിരുവനന്തപുരം സാഹിതി നാടകവേദി അവതരിപ്പിക്കുന്ന ചൊറിയൻ പുഴു യുദ്ധം നാടകവും അരങ്ങേറും.

വാർത്താസമ്മേളനത്തിൽ ജില്ലാ അധ്യക്ഷൻ ബഷീർ ആറങ്ങാടി, സംസ്ഥാന നിർവാഹക സമിതി അംഗം അഡ്വ. ഗംഗാധരൻ കുട്ടമത്ത്, ജില്ലാ പൊതു സംഘാടകൻ ദിനേശൻ മൂലക്കണ്ടം, ജില്ലാ ഖജാൻജി ഡോ. വിവേക് സുധാകരൻ, ജില്ലാ സെക്രട്ടറി ഡോ. ദിവ്യജിതിൻ, കാഞ്ഞങ്ങാട് നിയോജക മണ്ഡലം അധ്യക്ഷൻ അഡ്വ. ബിജു കൃഷ്ണ, തൃക്കരിപ്പൂർ നിയോജക മണ്ഡലം സംഘാടകൻ ടി. രാജീവൻ എന്നിവർ പങ്കെടുത്തു.