മൺപാത്ര നിർമ്മാണ സമുദായങ്ങൾക്ക് തൊഴിൽ സംവരണം അനുവദിക്കണം; കെഎംഎസ്എസ് സംസ്ഥാന സമ്മേളനം

തളിപ്പറമ്പ്: മൺപാത്ര നിർമ്മാണ സമുദായങ്ങളുടെ ഉന്നമനത്തിനായി തൊഴിൽ സംവരണമടക്കമുള്ള 21 ഇന അവകാശപത്രികകൾ നടപ്പിലാക്കണമെന്ന് കേരള മൺപാത്ര നിർമ്മാണ സമുദായ സഭ (കെ.എം.എസ്.എസ്.). തളിപ്പറമ്പിൽ നടന്ന പത്തൊമ്പതാമത് സംസ്ഥാന പ്രതിനിധി സമ്മേളനത്തിൽ ആവശ്യപ്പെട്ടു. സർക്കാർ തൊഴിലുകളിലും, ആർട്സ് ആൻഡ് സയൻസ്, പ്രൊഫഷണൽ പി ജി കോഴ്സുകളിലും സമുദായത്തിന് പ്രത്യേക സംവരണം അനുവദിക്കുക, സമുദായത്തെ പട്ടികജാതി ലിസ്റ്റിൽ ഉൾപ്പെടുത്തുന്നതിനുള്ള പുനഃശുപാർശകൾ നടപ്പിലാക്കുക, അന്യം നിന്നുപോകുന്ന മൺപാത്ര നിർമ്മാണ മേഖലയെ പരമ്പരാഗത വ്യവസായ പട്ടികയിൽ ഉൾപ്പെടുത്തി പ്രത്യേക ആനുകൂല്യങ്ങൾ നൽകുക തുടങ്ങിയ ആവശ്യങ്ങളാണ് ഉന്നയിച്ചത്. സംസ്ഥാന പ്രസിഡന്റ് ബി സുബാഷ് ബോസ് ആറ്റുകാൽ സമ്മേളനം ഉദ്ഘാടനം ചെയ്തു. വൈസ് പ്രസിഡന്റ് വി വി പ്രഭാകരൻ അധ്യക്ഷത വഹിച്ചു. ജനറൽ സെക്രട്ടറി രാജേഷ് പാലങ്ങാട്ട് പ്രവർത്തന റിപ്പോർട്ടും, ട്രഷറർ സി കെ ചന്ദ്രൻ വരവ് ചെലവ് കണക്കുകളും അവതരിപ്പിച്ചു. ചടങ്ങിൽ പി കൃഷ്ണൻകുട്ടി, കെ രവീന്ദ്രൻ, എം കെ ചന്ദ്രൻ, പി പി വി രവീന്ദ്രൻ, സംസ്ഥാന സെക്രട്ടറിമാരായ എസ് സനൽകുമാർ, കെ കെ പ്രതാപൻ, കെ പീതാംബരൻ തുടങ്ങി വിവിധ നേതാക്കൾ പ്രസംഗിച്ചു.