ലോറി തട്ടി പൊട്ടിവീണ മരക്കൊമ്പ് കാറിനുള്ളിൽ തുളച്ചുകയറി യുവതിക്ക് ദാരുണാന്ത്യം.

മലപ്പുറം: ചങ്ങരംകുളത്ത് കണ്ടെയ്‌നർ ലോറി തട്ടി പൊട്ടിവീണ മരക്കൊമ്പ് കാറിനുള്ളിൽ തുളച്ചു കയറി യുവതിക്ക് ദാരുണാന്ത്യം. എടപ്പാൾ സ്വദേശിനി ആതിരയാണ് (27)മരിച്ചത്. തൃശൂർ- കുറ്റിപ്പുറം സംസ്ഥാന പാതയിൽ ചങ്ങരംകുളം കടവല്ലൂരിലാണ് അപകടമുണ്ടായത്. ചങ്ങരംകുളം ഭാഗത്ത് നിന്നും പോകുകയായിരുന്ന കണ്ടെയ്‌നർ ലോറിയുടെ മുകൾ ഭാഗം റോഡിലേക്ക് ചാഞ്ഞ് നിന്നിരുന്ന തണൽമരത്തിൽ തട്ടിയതിനെ തുടർന്ന് മുറിഞ്ഞുവീണിരുന്നു. ഈ കൊമ്പ് ലോറിക്ക് പുറകിലായി വരികയായിരുന്ന, ആതിര സഞ്ചരിച്ച കാറിനകത്തേക്ക് തുളച്ചു കയറുകയായിരുന്നു. കാറിന്റെ മുൻ സീറ്റിലായിരുന്നു ആതിര. കാറിന്റെ മുൻവശം വഴി തുളച്ചുകയറിയ കൊമ്പ് ആതിരയുടെ തലയിൽ ഇടിച്ച ശേഷം പിൻവശത്തെ ചില്ലുകൂടി തകർത്തു. ഉടൻ ആശുപത്രിയിലെത്തിച്ചെങ്കിലും ജീവൻ രക്ഷിക്കാനായില്ല.