ഇറാൻ-ഇസ്രയേൽ സംഘർഷം; ആശങ്ക രേഖപ്പെടുത്തി യുഎഇ

അബുദാബി: മേഖലയിലെ തുടർച്ചയായ സംഘർഷങ്ങളിലും, ഇറാനിയൻ ആണവ കേന്ദ്രങ്ങൾ ലക്ഷ്യമിടുന്നതിലും, യുണൈറ്റഡ് അറബ് എമിറേറ്റ്സ് അഗാധമായ ആശങ്ക പ്രകടിപ്പിച്ചു. ഗുരുതരമായ പ്രത്യാഘാതങ്ങൾ ഒഴിവാക്കുന്നതിനും, മേഖല കൂടുതൽ ആഴത്തിലുള്ള അസ്ഥിരതയിലേക്ക് വലിച്ചിഴയ്ക്കപ്പെടാതിരിക്കുന്നതിനും സംഘർഷം ഉടനടി അവസാനിപ്പിക്കണമെന്ന് യുഎഇ ആവശ്യപ്പെട്ടു. സ്ഥിരത, സമൃദ്ധി, നീതി എന്നിവ പ്രോത്സാഹിപ്പിക്കുന്ന സമഗ്രമായ സമീപനങ്ങളിലൂടെ തർക്കങ്ങൾ പരിഹരിക്കുന്നതിന് നയതന്ത്രത്തിനും, സംഭാഷണത്തിനും മുൻഗണന നൽകേണ്ടതിന്റെ പ്രാധാന്യം വിദേശകാര്യ മന്ത്രാലയത്തിന്റെ പ്രസ്താവനയിൽ വ്യക്തമാക്കി. സംഘർഷത്തിന്റെ വിനാശകരമായ പ്രത്യാഘാതങ്ങളിൽ നിന്ന് മേഖലയെയും, അവിടുത്തെ ജനങ്ങളെയും സംരക്ഷിക്കുന്നതിന് സെൻസിറ്റീവും അപകടകരവുമായ സംഭവവികാസങ്ങളുടെ സമഗ്രമായ പരിഹാരത്തിനായുള്ള ശ്രമങ്ങൾ ശക്തമാക്കണമെന്ന് അന്താരാഷ്ട്ര സമൂഹത്തോടുള്ള ആഹ്വാനം യുഎഇ ആവർത്തിച്ചു. കൂടാതെ, മേഖലയുടെ ദീർഘകാല പ്രശ്‌നങ്ങൾ പരിഹരിക്കുന്നതിനുള്ള ഗൗരവമായ ശ്രമങ്ങളിലൂടെ അവരുടെ ഉത്തരവാദിത്തങ്ങൾ ഉയർത്തിപ്പിടിക്കണമെന്ന് മന്ത്രാലയം ഐക്യരാഷ്ട്രസഭയോടും യുഎൻ സുരക്ഷാ കൗൺസിലിനോടും അഭ്യർത്ഥിച്ചു. ഈ പ്രശ്‌നങ്ങൾ ഇപ്പോൾ നിർണായക ഘട്ടത്തിലാണ്. പ്രാദേശികവും അന്തർദേശീയവുമായ സമാധാനത്തിനും, സുരക്ഷയ്ക്കും വർദ്ധിച്ചുവരുന്ന ഭീഷണിയാണിത്. നിർണായകമായ പ്രശ്നങ്ങൾ ചർച്ചകളിലൂടെ പരിഹരിക്കുന്നതിന് ഗൗരവമായ ഇടപെടൽ ആവശ്യമാണെന്ന് മന്ത്രാലയം ചൂണ്ടിക്കാട്ടി. മേഖലയുടെ ചരിത്രാനുഭവങ്ങളിൽ നിന്നും മുൻകാല സംഘർഷങ്ങളിൽ നിന്നും പാഠങ്ങൾ ഉൾക്കൊള്ളേണ്ടതിന്റെ പ്രാധാന്യവും മന്ത്രാലയം എടുത്തു പറഞ്ഞു.