കുംബഡാജെയിലെ പുഷ്പലതയുടെ മരണം കൊലപാതകമെന്ന് പോസ്റ്റ്മോർട്ടം റിപ്പോർട്ട്

കാസർകോട്: ബദിയടുക്ക പോലീസ് സ്റ്റേഷൻ പരിധിയിലെ കുംബഡാജെ മവ്വാർ ആജിലയിലെ വീട്ടിൽ ഒറ്റക്ക് താമസിച്ചിരുന്ന വയോധികയുടെ മരണം കൊലപാതകമാണെന്ന് പോസ്റ്റ്മോർട്ടം റിപ്പോർട്ട്. പരിയാരം മെഡിക്കൽ കോളേജ് ആശുപത്രിയിൽ വെള്ളിയാഴ്ച ഉച്ചയോടെയാണ് പോസ്റ്റ്മോർട്ടം പൂർത്തിയായത്. കഴുത്തു ഞെരിച്ചും , ശ്വാസംമുട്ടിച്ചുമാണ് കൊല നടത്തിയത്. വ്യാഴാഴ്ച രാവിലെയാണ് വീട്ടിൽ തനിച്ച് താമസിക്കുന്ന പുഷ്പലത(72) യെ മരിച്ച നിലയിൽ കാണപ്പെട്ടത്. പോലീസിന്റെ പ്രാഥമിക പരിശോധനയിൽ തന്നെ കൊലപാതകമാണെന്ന് സംശയമുണ്ടായിരുന്നു. ബന്ധുക്കൾ സംശയമുന്നയിച്ചതോടെയാണ് പോസ്റ്റ്മോർട്ടം പരിയാരത്തേക്ക് മാറ്റിയത്. കൊലയാളിക്കായി പോലീസ് അന്വേഷണം ഊർജിതമാക്കി.